Oktubre 05, 2026

Ebanghelyo: Lucas 10:25-37
May tumindig na isang guro ng Batas para subukin si Jesus. Sinabi niya: “Guro, ano ang gagawin ko para makamit ang buhay na walang hanggan?” Sumagot sa kanya si Jesus: “Ano ba ang nasusulat sa Batas, at paano mo ito naiintindihan?” Sumagot ang guro ng Batas: “Mamahalin mo ang Panginoon mong Diyos nang buo mong puso at nang buo mong kaluluwa at nang buo mong lakas at nang buo mong pag-iisip. At nasusulat din naman: Mamahalin mo ang iyong kapwa gaya ng iyong sarili.” Noo’y sinabi ni Jesus sa kanya: “Tama ang sagot mo. Gawin mo ito at mabubuhay ka.” Pero gustong mangatwiran ng guro ng Batas kaya sinabi niya kay Jesus: “At sino naman ang aking kapwa?” Sinagot siya ni Jesus: “May isang taong bumaba mula sa Jerusalem papunta sa Jerico at nahulog siya sa kamay ng mga tulisan. Hinubaran siya ng mga ito at binugbog at saka iniwang halos patay na. Nagkataon namang may isang paring pababa rin sa daang iyon. Pagkakita sa kanya, lumihis ito ng daan. Gayundin naman, may isang Levitang napadaan sa lugar na iyon; nang makita siya’y lumihis din ito ng daan. Pero may isang Samaritano namang naglalakbay na napadaan sa kinaroroonan niya; pagkakita nito sa kanya, naawa ito sa kanya. Kayat lumapit ito, binuhusan ng langis at alak ang kanyang mga sugat at binendahan. Isinakay nito ang tao sa sarili niyang hayop at dinala sa isang bahay-panuluyan at inalagaan. Kinabukasan, dumukot ang Samaritano ng dalawang denaryo, ibinigay sa may-ari ng bahay-panuluyan at sinabi: ‘Alagaan mo siya; sasagutin ko ang anumang karagdagang gastos pagbalik ko’.” At sinabi ni Jesus: “Sa palagay mo, sino sa tatlong ito ang naging kapwa sa taong nahulog sa kamay ng mga tulisan?” Sagot ng guro: “Ang nagdalang-habag sa kanya.” Kaya sinabi ni Jesus sa kanya: “Humayo ka’t ganoon din ang gawin.”

Pagninilay

Seguridad ng ating tahanan at pag-aari ang layunin ng pagtatayo natin ng bakod. Ligtas at malayo nga naman sa panganib sa loob ng ating mga bakuran. Subalit kung minsan, ang bakod ay nagmimistulang kulungan na humahadlang sa atin para puntahan ang kapwa. Ang bakuran ay sagisag ng ating ‘comfort zone’ na kung minsan ay ayaw na nating lisanin para magmalasakit sa iba. Sa talinhaga ng Mabuting Samaritano, hinihimok tayo ni Jesus na sirain ang bakod ng pagkakabahagi. Walang anumang pagkakahati – dahil sa lahi, kulay o relihiyon – ang dapat na maging hadlang para dumamay sa nangangailangan. Pinatotohanan ng Mabuting Samaritano na “ang pag-ibig ay walang kinikilalang hangganan.” Ani Gustavo Gutierrez, ang taong pinaslang at iniwang halos patay na sa tabing daan ay sagisag ng mga dukha sa ating panahon. Dahil sa kasalanan panlipunan, patuloy silang ninanakawan ng kanilang bahagi sa yaman ng daigdig, niyuyurakan ang karapatan, at ngayon ay patuloy na nakakaligtaan ng lipunan. Ang talinghaga ay paanyayang lumabas tayo sa bakuran ng pagkamakasarili upang tumungo sa mga pook na nangangailangan ng paglingap at paghilom.

© Copyright Pang Araw-araw 2026