Ebanghelyo: Lucas 2:22-35
Nang dumating na ang araw ng paglilinis nila ayon sa Batas ni Moises, dinala ang sanggol sa Jerusalem para iharap sa Panginoon – tulad ng nasusulat sa Batas ng Panginoon: Lahat ng panganay na lalaki ay ituturing na banal para sa Panginoon. Dapat din silang mag-alay ng sakripisyo tulad ng binabanggit sa Batas ng Panginoon: isang pares na batubato o dalawang inakay na kalapati. Ngayon, sa Jerusalem ay may isang taong nagngangalang Simeon; totoong matuwid at makadiyos ang taong iyon. Hinihintay niya ang pagpapaginhawa ng Panginoon sa Israel at sumasakanya ang Espiritu Santo. Ipinaalam naman sa kanya ng Espiritu Santo na hindi siya mamamatay hangga’t hindi niya nakikita ang Mesiyas ng Panginoon. Kaya pumunta siya ngayon sa Templo sa pagtutulak ng Espiritu, nang dalhin ng mga magulang ang batang si Jesus para tuparin ang kaugaliang naaayon sa Batas tungkol sa kanya. Kinalong siya ni Simeon sa kanyang mga braso at pinuri ang Diyos, at sinabi: “Mapayayaon mo na ang iyong utusan, Panginoon, nang may kapayapaan ayon na rin sa iyong wika; pagkat nakita na ng aking mga mata ang iyong pagliligtas na inihanda mo sa paningin ng lahat ng bansa, ang liwanag na ibubunyag mo sa mga bansang pagano at ang luwalhati ng iyong bayang Israel.” Nagtataka ang ama at ina ng bata sa mga sinasabi tungkol sa kanya. Pinagpala naman sila ni Simeon at sinabi kay Mariang ina ng bata: “Dahil sa kanya, babagsak o babangon ang mga Israelita at magiging tanda siya sa harap nila at kanilang sasalungatin. Kaya mahahayag ang lihim na pagiisip ng mga tao. Ngunit paglalagusan naman ng isang punyal ang puso mo.”
Pagninilay
Nang inihandog si Jesus sa templo, ipinakita nina Maria at Jose ang kanilang katapatan sa Batas ng kanilang relihiyon kung saan pinaniniwalaan nila ay ang batas din ng Panginoon. Dito rin makikita ang kababaangloob ng mga magulang ni Jesus. Kahit na alam nilang siya ay anak ng Diyos, sumunod pa rin sila sa Batas ni Moises. Ang kanilang pagsunod ay hindi nasayang sapagkat may bagong pagpapahayag na kinasihan ng Espiritu Santo para kay Jesus at Maria. Dito ay nadagdagan ang kanilang kaalaman tungkol kay Jesus at itinago ito sa puso ni Maria. Ang pagsamba tuwing Linggo ay isang batas ng simbahan at utos din ng Panginoon. Nawa’y maging masigasig tayo na tandaan ito sa pamamagitan ng pagsasakripisyo sa ating sarili at pagbubukas ng ating isip at puso sa Panginoon na nagpapakilala sa ating pagsamba.
© Copyright Pang Araw-Araw 2021