Ebanghelyo: Mateo 13:36-43
At pinaalis niya ang mga tao at saka pumasok sa bahay. Lumapit noon sa kanya ang kanyang mga alagad at nagtanong: “Ipaliwanag mo sa amin ang talinhaga ng mga trigo sa bukid.” Sumagot si Jesus: “Ang nagtanim ng ma-buting buto ay ang Anak ng Tao. Ang bukid naman, ang daigdig; ang mabuting buto, ang mga tao ng Kaharian; at ang masasamang damo, ang mga tauhan ng demonyo. Ang kaaway na naghasik sa kanila ay ang demonyo; ang pag-aani ay ang katapusan ng mundo, at ang mga manggagawa ay ang mga anghel. Kung paanong tinitipon ang masasamang damo at sinusunog sa apoy, ganito rin ang mangyayari sa katapusan ng mundo. Ipadadala ng Anak ng Tao ang kanyang mga anghel at titipunin nila sa kanyang kaharian ang mga eskandalo at ang mga gumagawa ng masama. At itatapon ang mga ito sa nagliliyab na pugon kung saan may iyakan at pagngangalit ng ngipin. At pagkatapos nito, magniningning ang mga makatarungan tulad ng araw sa Kaharian ng kanilang Ama. Makinig ang may tainga!
Pagninilay
Tuwing manonood tayo ng teleserye makikita natin na tayo ay lubos na natutuwa at nakikisimpatiya sa bida. Sa kabilang banda, pagkainis naman ang ating nadarama sa kontrabida. Inaabangan natin ang bawat araw na lumilipas at sa bawat pagkilos ng bida, tayo ay nakakabuo ng matibay na ugnayan. Marahil ay dahil tayo ay mayroon natural na pagkampi sa kung ano at sinuman ang mabuti. Sa haba ng istorya ng mga teleserye, sa huli ay bida pa rin ang nananaig. Ang kabutihan pa rin ang nagwawagi. Sa ating pakikipagbuno sa buhay, ang panawagan ay manatili ang pagpili sa kabutihan. Ipagpatuloy ang pagiging mabuti sa kabila ng mga kahirapan, kurapsyon, kasakiman at kawalan ng malasakit ng ibang tao. Sa huli, ito ang papaboran ng Diyos. Ang kabutihan ay nagbubunga rin ng kabutihan at ito ay hindi lamang para sa atin, ito ay magbubunga rin para sa ating kapwa.
© Copyright Pang Araw-Araw 2021