Ebanghelyo: Lucas 11:15-26
Ngunit sinabi ng ilan sa kanila: “Pinalalayas niya ang mga ito sa tulong ni Beelzebul na pinuno ng mga demonyo.” Gusto naman ng iba na subukin si Jesus at humingi sila sa kanya ng isang tanda galing sa langit. Alam ni Jesus ang kanilang iniisip kaya sinabi niya sa kanila: “Mabubuwag ang bawat kahariang nagkakahati-hati at magigiba roon ang mga sambahayan. Ngayon, kung nagkakahati-hati si Satanas, paano magtatagal ang kanyang kaharian? Di nga ba’t sinasabi ninyo na nagpapalayas ako ng mga demonyo sa tulong ni Beelzebul? Kung sa pamamagitan ni Beelzebul ako nagpapalayas ng mga demonyo, paano naman napalalayas ng inyong mga kaanib ang mga ito? Sila mismo ang nararapat sumagot sa inyo. Sa daliri ng Diyos ako nagpapalayas ng mga demonyo kaya sumapit na sa inyo ang kaharian ng Diyos. Kung sandatahang binabantayan ni Malakas ang kanyang palasyo, hindi magagambala ang kanyang mga pag-aari. Pero kung salakayin siya ng mas makapangyarihan sa kanya at talunin siya, maaagaw nito ang kanyang mga armas na kanyang inasahan at ipamamahagi ang kanyang mga ari-arian. Ang hindi panig sa akin ay laban sa akin, at ang hindi nagtitipong kasama ko ay nagpapangalat. Kapag lumabas sa tao ang maruming espiritu, nagpapalabuy-laboy ito sa mga lugar na walang tubig sa paghahanap ng pahingahan. Pero wala siyang natatagpuan at sinasabi niya: ‘Babalik ako sa inalisan kong tirahan.’ Pagdating niya, natatagpuan niya ito na nawalisan na at maayos pa. Kaya naghahanap siya at nagsasama ng pito pang espiritung mas masama pa kaysa kanya; pumapasok ang mga ito at doon tumitira. Kaya mas masama ang huling kalagayan ng taong iyon kaysa dati.”
Pagninilay
Tunay na mahirap kumalas sa masamang gawi. Subalit mas mahirap manatili sa malinis at matuwid na pamumuhay. “Balik sa dating ugali.” Ito ang malimit na kinahuhulugan ng mga taong nagpupumilit magbago. Kapag naiwaksi na ng isang tao ang masamang gawain, kailangang palitan niya ito ng mabuti upang hindi na manumbalik pa ang dating gawi. Sabi ng isang lektor, dati po akong nagkakalat ng masamang balita. Subalit na-overcome ko ito nang matututo akong magpahayag ng ebanghelyo sa kapwa. Upang maging ganap ang pagbabagong-buhay, hindi sapat ang pagtigil sa paggawa ng masama. Higit na mahalaga ang aktibong paggawa ng mabuti. “Nature does not tolerate a vacuum.” Hindi dapat iwang hungkag ang puso. Dapat punuin ito ng kabutihan at pagmamahal. Kulang ang pagsisikap na talikdan ang lumang pamumuhay, kailangan ding harapin ang bagong buhay sa Espiritu.
© Copyright Pang Araw-araw 2026





