Hulyo 21, 2026

Ebanghelyo: Mateo 12:46-50
Nagsasalita pa si Jesus sa mga tao nang dumating ang kanyang ina at mga kapatid para makipag-usap sa kanya, at naghihintay sila sa labas. Kaya may nagsabi sa kanya: “Nasa labas ang iyong ina at mga kapatid; gusto ka nilang makausap.” Sumagot si Jesus sa nagsabi sa kanya: “Sino ang aking ina? Sino ang aking mga kapatid?” At itinuro niya ang kanyang mga alagad at sinabi: “Narito ang aking ina at mga kapatid. Ang nagsasagawa sa kalooban ng aking Ama sa Langit ang aking kapatid na lalaki at kapatid na babae at ina.”

Pagninilay

Ang Ebanghelyo ay nagpapahayag ng isang radikal na pananaw tungkol sa tunay na pamilya ng Diyos. Dito, ipinapaalala sa atin ni Jesus na ang pagiging bahagi ng kaniyang pamilya ay hindi lamang nakabase sa dugo o lahi, kundi sa pagsunod sa kalooban ng Diyos. Ipinapakita nito na ang kaharian ng Diyos ay bukas para sa lahat—mga babae, lalaki, bata, matanda, mayaman, mahirap— anumang uri ng pamumuhay o katayuan. Sa kontekstong ito, ang pamilyang Kristiyano ay hindi limitado sa tradisyonal na pagkakaugnay ng pamilya. Ang bawat isa na nagsisikap at sumusunod sa kalooban ng Diyos, anuman ang kanilang kasarian, kulay, o kalagayan, ay kabilang sa malaking pamilya ng Diyos. Ito ay isang paanyaya para sa lahat na makibahagi sa isang buhay ng pagmamahal, malasakit, at pagkakaisa. Sa panahon ngayon, napakahalaga ng mensaheng ito. Sa gitna ng mga isyu ng diskriminasyon at pagkahati-hati sa lipunan, tinatawag tayo ng Diyos na maging mga instrumento ng pagkakaisa at pagmamahal, anuman ang ating pinagmulan. Ang pagiging Kristiyano ay nangangahulugang bukas ang puso sa pagtanggap at pagyakap sa iba, lalong-lalo na sa mga itinakwil o isinantabi ng lipunan.

© Copyright Pang Araw-araw 2026