Nobyembre 30, 2025

Ebanghelyo: Mateo 24:37-44
Katulad ng nangyari sa panahon ni Noe, gayundin sa pagdating ng Anak ng Tao. Noong mga araw na iyon bago dumating ang Baha, kumakain at umiinom ang mga tao at nag-aasawa, hanggang sa araw na pumasok si Noe
sa daong. Ngunit wala silang alam hanggang dumating ang baha at tinangay silang lahat. Ganoon din sa pagdating ng Anak ng Tao. Sa dalawang lalaking nasa bukid, kukunin ang isa at iiwan ang isa. Sa dalawang babaeng gumigiling ng trigo, kukunin ang isa at iiwan ang isa. Kaya magbantay kayo sapagkat hindi ninyo alam ang araw ng pagdating ng inyong Panginoon. Isipin ninyo ito: kung alam ng may-ari ng bahay kung anong oras ng gabi darating ang magnanakaw, magbabantay siya at hindi niya pababayaang pasukin ang bahay. Kaya maging handa kayo sapagkat sa oras na hindi ninyo inaasahan darating ang Anak ng Tao.

Pagninilay

“Maging handa lagi!” Sa Mabuting Balita sa Linggong ito, ipinapakita sa atin ang kawalan ng kasiguraduhan sa maraming bagay sa buhay ng tao at isa na nga dito ay ang pagdating ng Anak ng Tao. Maaaring nating makita na hindi lamang ito tumutukoy sa kanyang muling pagbalik sa wakas ng panahon kundi pati na rin ang ating pagharap sa kanya sa paghuhukom sa wakas ng ating buhay sa mundong ito. Ang pagdating ng kamatayan sa ating buhay ay wala ring kasiguraduhan. Kung kaya nga, maganda ang payo ng ating Ebanghelyo: maging handa lagi! Subalit, paano naman natin magagawa ang maging palaging handa? Sa ating buhay Kristiyano, ito ay magagawa natin sa pagkapit sa nag-iisang sigurado sa ating buhay – walang iba kundi ang Diyos at ang kanyang pagmamahal. Maraming bagay man ang magbago sa ating buhay, ang kanyang awa at pag-ibig kailanman ay nananatili. Ang Diyos ay palaging tapat sa atin, wala itong duda. Ang tanong na lamang ay: Magiging tapat din ba tayo sa kanya? Sa pamamagitan ng katapatang ito, ang ating kinabukasan na walang kasiguraduhan ay nagkakaroon ng katiyakan dahil alam natin na ito ay hahantong sa kanyang bigay na kaligtasan.

© Copyright Pang Araw-araw 2025