Setyembre 19, 2026

Ebanghelyo: Lucas 8:4-15
Napakakapal na tao ang nagkakatipon dahil pinupuntahan si Jesus ng mga tao mula sa kani-kanilang mga bayan. Kaya nagsalita siya sa talinhaga: “Lumabas ang manghahasik para maghasik ng kanyang binhi. Sa kanyang paghahasik, may ilang butong nahulog sa tabi ng daan at tinapak-tapakan at kinain ng mga ibon sa langit. Nahulog ang iba sa batuhan, at nang sumibol ay nalanta dahil sa kawalan ng halumigmig. Nahulog ang iba pang buto sa gitna ng tinikan, at sa sabay nilang paglaki, sinikil ito ng mga tinik. Nahulog naman ang iba pa sa matabang lupa at nang sumibol ay nagbunga nang tig-iisang daan.” Pagkasabi nito’y sumigaw siya: “Makinig ang may tainga.” At tinanong siya ng kanyang mga alagad kung ano ang kahulugan ng talinhagang ito. Kayat sinabi niya: “Sa inyo ipinagkaloob na malaman ang mga lihim ng kaharian ng Diyos, at sa iba nama’y sa mga talinhaga lamang para tumingin sila at hindi makakita, makinig at hindi makaunawa. Ito ang kahulugan ng talinhaga. Ang binhi ay ang salita ng Diyos. Ang mga nasa tabi ng daan ay ang mga nakakarinig nito pero agad namang dumarating ang diyablo; inaagaw niya ang salita mula sa kanilang isipan upang huwag silang manalig at maligtas. Ang mga nasa batuhan ay ang mga nakakarinig na masayang tinatanggap ang salita. Ngunit wala silang ugat kaya sandali silang nananalig at tumitiwalag naman sa panahon ng tukso. Ang nahulog naman sa mga tinikan ay ang mga nakakarinig ngunit sa pagpapatuloy nila’y sinikil ng mga kabalisahan, ng kayamanan at ng mga kasiyahan sa buhay kaya hindi sila nakapagbunga. Ang nahulog naman sa matabang lupa ay ang mga nakakarinig sa salita at iniingatan ito nang may dakila’t mabuting loob at nagbubunga sila sa kanilang pagtitiyaga.

Pagninilay

Maraming bagay ang nagiging hadlang upang tunay na lumago ang ating pananampalataya. Maaaring ito’y ang mga abala sa buhay, tukso, o ang takot sa mga pagsubok. Tulad ng binhing nahulog sa batuhan o tinik, ang salita ng Diyos ay madaling mawala sa ating isipan kapag tayo ay nakatuon sa mga makamundong bagay. Napakalaking hamon ang manatiling tapat sa kabila ng mga pagsubok, ngunit ito ang panawagan ng talinhaga—ang pagiging matatag na lupa na handang tanggapin at itaguyod ang salita ng Diyos. Hinihikayat tayo ng ebanghelyong ito na suriin ang ating mga puso. Paano natin tinatanggap ang salita ng Diyos? Nagbibigay ba tayo ng sapat na oras at espasyo upang ito’y lumago sa ating buhay? Sa pamamagitan ng masidhing pananampalataya at pagsasabuhay ng salita ng Diyos, tayo ay magbubunga ng kabutihan na kapaki-pakinabang, hindi lamang sa ating sarili, kundi sa buong pamayanan.

© Copyright Pang Araw-araw 2026