ni Abraham de la Torre
Daming bituin
Dulot sa gabi’y aliw
Kutitap ay kindat mandin
Sa pangmasid ng pusong may dimdim
Simoy ng hangin
Anas na panalangin
Ng pighating sakdal timtim
Lugmok, gapi, wasak na damdamin
Ang gabi’y lungkot
Dulot sa puso’y kirot
Hinahanap na kapwa puso
Ay nawaglit pumalaot
Pusikit ang karimlang sapot
Pag-iisa’y salot
Kailan ang umaga
Hupa nyaring dusa
Pagsamo ay dulutan lamang
Ng isang munting lingap
Dinggin, damhin piping samo’t hangad
Bigyan ang aking gabi ng ilaw
Isang halik, dalawang ngiti
Ikumot mo sa buhay ko
Gabing walang bituin
Buwan mandi’y nahihimbing
Nahan ang iyong piling
Luwat nang pag-asam sa pagdating
Hanging nagdaan
Hamog sa lupa’y sinamsam
Sinaboy sa silanganan
Pagbubunyi sa madaling-araw
Ngayo’y tanaw ko na
Ang hugis mong malayo pa
Langhap ko ang nawaglit mong hinga
Dama ko ang iyong hibla
Bituin, gabi, hangi’y malayo na
Umaga na pala