Disyembre 01, 2025

Ebanghelyo: Mateo 8:5-11
Pagdating ni Jesus sa Capernaum lumapit sa kanya ang isang kapitan at nakiusap sa kanya: “Ginoo, nakahiga sa bahay ang aking katulong. Lumpo siya at sobra na ang paghihirap…” Sinabi sa kanya ni Jesus: “Paroroon ako at pagagalingin ko siya.” Sumagot ang kapitan: “Hindi ako karapat-dapat para tumuloy ka sa bahay ko. Mag-utos ka lang at gagaling na ang aking katulong. May nag-uutos sa akin at may inuutusan din ako, at pag sinabi ko sa isa sa mga kawal na nasa ilalim ko: ‘Pumaroon ka,’ pumaparoon siya. At sinasabi ko naman sa isa pa: ‘Pumarito ka,’ at pumaparito siya; at sa aking katulong: ‘Gawin mo ito,’ at ginagawa niya ito.” Nang marinig ito ni Jesus, humanga siya at sinabi sa mga sumusunod sa kanya: “Sinasabi ko sa inyo, wala pa akong natagpuang ganitong paniniwala sa Israel. Sinasabi ko sa inyo: marami ang darating mula sa silangan at sa kanluran para makisalo kina Abraham, Isaac at Jacob sa kaharian ng Langit.

Pagninilay

“Mga kahanga-hangang ginawa.” Ang paghanga ni Jesus sa kabutihan ng Kapitan ay isang palatandaan na si Jesus ay totoong tao. Bilang tao, may mga hinahangaan tayo at maging tayo man sa ating sarili ay dapat kakitaan ng mga kahanga-hanga. Ang pagiging mabuting tao ay hindi madaling gawin at dapat nating hangaan ang mga taong nakakagawa nito. Nakakalungkot na minsan mas bida ang mga taong gumagawa ng masama. Ang mga taong tampalasan ay binibigyang kasikatan. Sa social media at mga palabas bibihira ang mga taong ibinabalita dahil sa kanilang kahanga-hangang ginawa. Kaya naman sa ating pananampalataya, mabuting ating ipinagdiriwang ang kabanalan ng mga Santo. Ang ating pagpupugay sa kanila ay kagaya lamang ng pagpupugay ni Jesus sa mga taong may mabuting kalooban, katulad ng kapitan sa ebanghelyo. Maging laman nawa ng ating mga kwento at pangangaral ang mga taong nagpapamalas ng mabubuting asal. Gayundin naman, matuto rin tayong parangalan ang ating sarili sa mga mumunting kabutihang ating nagagawa. Sabi nga ni San Francisco ng Sales, bibihira ang pagkakataong makagawa tayo ng kagilagilalas na kabanalan subalit malimit ang mumunting gawang
kabanalan ay nakakaligtaan.

© Copyright Pang Araw-araw 2025