Ebanghelyo: Mateo 10:16-23
Isinusugo ko kayo ngayon na parang mga tupa sa gitna ng mga asong-gubat. Maging matalino nawa kayo gaya ng mga ahas at walang-malay na parang mga kalapati. Mag-ingat sa mga tao; ibibigay nga nila kayo sa mga sanggunian at hahagupitin kayo sa kanilang mga sinagoga. Dadalhin din nila kayo sa mga pinuno at mga hari dahil sa akin, at dapat kayong magbigay-patotoo sa kanila at sa mga pagano.
Pag nilitis naman kayo, huwag mag-alala sa inyong sasabihin; sa oras na iyo’y ibibigay nga sa inyo ang inyong sasabihin. Sapagkat hindi kayo ang magsasalita kundi ang Espiritu ng inyong Ama ang magsasalita sa pamamagitan ninyo.
Ipapapatay ng kapatid ang sariling kapatid, ng ama ang kanyang anak; at isasakdal ng mga anak ang kanilang mga magulang at ipapapatay sila. Kamumuhian kayo ng lahat dahil sa akin, ngunit ang mananatiling matatag hanggang wakas ang siyang maliligtas.
Pag inusig kayo sa isang bayan, tumakas kayo sa iba. Sinasabi ko sa inyo, bago ninyo matapos daanan ang lahat ng bayan sa Israel, darating na ang Anak ng Tao.
Pagninilay
Naramdaman ba ninyo ang “kaba” na nararamdaman ni Jesus habang ibinibigay ang huling mga paalala at habilin sa kanyang mga alagad? Damangdama natin hindi lang ang kanyang pagka-Diyos, naroon din ang pag-aalala ng isang magulang sa kanyang mga anak. Matapos niyang turuan ang mga alagad, batid ni Jesus na kailangan nilang humayo. May pangamba pero hindi pwedeng hadlangan ang kanilang paglago at pagharap sa mga responsibilidad. Ang isang magulang, hangga’t maaari, ayaw niyang mawalay sa kanyang paningin ang kanyang anak. Alam niya rin kung ano ang nasa mundo na kanilang kakaharapin. Kaya hindi rin naman siya nagiging hadlang upang harapin nila ang hamon sa labas ng tahanan. Isang araw kailangan ng mga anak na lumabas at mabuhay nang sila lang. Ang mahalaga ay naituro ng magulang sa mga anak kung ano ang dapat nilang matutunan. Kailangang maging matapang at matalino nang hindi maligaw ng landas. Hindi natin malalaman ang mga paraan ng buhay kung hindi natin susubukan. Basta’t magtiwala lang at laging tandaan ang mga aral na natutunan. Tayo ay mabubuhay kahit gaano kahirap ang hamon ng buhay.
© Copyright Pang Araw-Araw 2022