Ebanghelyo: Mt 5: 20-26
Sinasabi ko sa inyo na kung hindi mas ganap ang inyong kabanalan kaysa sa mga guro ng Batas at mga Pariseo, hinding-hindi kayo makapapasok sa Kaharian ng Langit. Narinig na ninyo na sinabi sa inyong mga ninuno: Huwag kang papatay; ang sinumang pumatay ay lilitisin. Sinasabi ko naman sa inyo: Ang sinumang magalit sa kanyang kapatid ay lilitisin. Ang sinumang manuya sa kanyang kapatid ay lilitisin sa Sanggunian. At ang sinumang manghiya sa kanyang kapatid ay nararapat lamang itapon sa apoy ng impiyerno. Kaya sa paglalagay mo sa altar ng iyong hain at naalaala mong may reklamo sa iyo ang kapatid mo, iwan mo muna ang iyong hain sa harap ng altar at puntahan mo ang iyong kapatid para makipagkasundo sa kanya. At saka ka bumalik at ialay ang iyong hain sa Diyos. Makipagkasundo na sa iyong kaaway habang papunta pa kayo sa hukuman, at baka ipaubaya ka niya sa hukom na magpapaubaya naman sa iyo sa pulisya na magkukulong sa iyo. Talagang sinasabi ko sa iyo: hindi ka makalalabas hangga’t di mo nababayaran ang kahuli-hulihang sentimo.
Pagninilay
Ang pahayag ni Jesus sa Ebanghelyo ay isa sa pinamahirap na gawin sa ating buhay. Ang humingi ng tawad para sa isang pagkakamali. Magkaiba ang pagpapatawad at ang humingi ng tawad. Mas mahirap ang humingi ng tawad dahil parang binababa natin ang ating sarili at ayaw nating ituring na mahina o mababa tayo sa harap ng iba. Ito ang hamon sa pagsasabuhay ng kababaangloob. Kaya ang tinutukoy ni Jesus sa Ebanghelyo ay tungkol sa paghingi ng tawad. Ginawa Niyang sukatan ay ang mga guro ng Batas at mga Pariseo, na dapat mas higit pa ang kanilang kakayahang umangkin ng pagkakamali at humingi ng tawad upang makapasok sa Kaharian ng Langit. Hindi maiiwasan na maraming beses din tayong nakasasakit ng ating kapwa, na tayo ay nagkakamali. Madalas, ang kakulangan ng pag-angkin ng pagkakamali ang nagiging sanhi ng mahabang alitan. Dahil nais ng bawat isa na iangat ang sarili, ang pag-amin sa isang pagkakamali ay tinuturing na isang kahinaan at kababaan. Ipinapaunawa ni Jesus na ang daan patungo sa ating kaligtasan ay ang kababaanloob. Kaya pinapaalala ni Jesus sa ibang pagkakataon, na ang mababa ay Kanyang itataas.
© Copyright Pang Araw-Araw 2024