Ebanghelyo: Mc 4: 26-34
At sinabi niya: “Maihahambing ang kaharian ng Diyos sa paghahasik ng isang tao ng buto sa lupa. Tulog man siya o gising, sa gabi o araw, sumisibol ang binhi at lumalago nang hindi niya namamalayan. Nagbubunga ang lupa sa ganang sarili nito: una’y ang usbong, saka ang uhay at ang butil na humihitik sa uhay. At kapag nagbunga na ito, agad siyang magpapadala ng karit sapagkat sumapit na ang anihan.” At sinabi niya: “Sa ano natin maikukumpara ang kaharian ng Diyos? Sa anong talinhaga natin ito maipakikilala? Natutulad ito sa paghahasik ng buto ng mustasa na pinakamaliit sa mga binhing inihahasik sa lupa. Ngunit pagkahasik nito, tumataas ito at lumalaki na higit pa sa lahat ng gulay at nagsasanga nang malaki hanggang sumilong sa kanyang lilim ang mga ibon ng langit.” Itinuro niya sa kanila ang lahat ng ito sa pamamagitan ng mga talinhagang gaya nito ayon sa kakayahan ng kanilang isipan. Hindi siya nagturo sa kanila nang hindi gumagamit ng mga talinhaga. Ngunit nilinaw niya ang lahat sa kanyang mga alagad nang silasila na lamang.
Pagninilay
I pinahayag si Jesus sa mga tao, lalo na sa mga naniniwala sa Kanya ang tungkol sa “Talinhaga ng Paglago”. Ang kwento ay tungkol sa isang magsasaka na nagtanim ng mga buto ng mustasa at lumago hanggang sa panahon ng pag-aani. Ito ay nagpapakita na kapag ang binhi ng Salita ng Diyos ay isinasabuhay natin, siguradong magiging malago ang ating pananampalataya bilang tagasunod sa ating Panginoong Jesukristo. Ang talinhagang ito ay nagpapakita na ang Kaharian ng Diyos ay patuloy na lalago at lalaganap hanggang sa katapusan ng panahon. Kaya kailangan nating pagtibayin ang ating kalooban na gumawa ng tama sa mata ng Diyos at magbigay sana tayo ng pag-asa sa kapwa upang sila’y patuloy na manalig sa Diyos. Ito ay nagtuturo din sa atin na maghasik ng Salita ng Diyos at bukas-palad nating ipaabot ang kanyang mga biyaya sa lahat.
© Copyright Pang Araw-Araw 2024