Ebanghelyo: Juan 5:1-16
Pagkatapos nito, may piyesta ng mga Judio at umahon pa-Jerusalem si Jesus. May isang palanguyan sa Jerusalem na Betzata ang tawag sa Hebreo, malapit sa Pintuan ng mga Tupa. May limang pasilyo ito na may bubong. Nakahandusay sa mga ito ang isang pulutong ng mga maysakit, mga bulag, mga pilay at mga lumpo (habang naghihintay sa pagkilos ng tubig. Sapagkat paminsan-minsa’y bumababa sa palanguyan ang Anghel ng Panginoon at kinakalawkaw ang tubig. At umiigi sa anumang sakit ang unang makalusong matapos makalawkaw ang tubig.). At doo’y may taong tatlumpu’t walong taon nang may sakit. Pagkakita ni Jesus dito na nakahandusay at pagkaalam niya na matagal na ito roon, sinabi niya sa kanya: “Gusto mo bang umigi?” Sumagot sa kanya ang maysakit: “Wala po akong taong makapaghahagis sa akin sa palanguyan kapag nakalawkaw na ang tubig. Habang paroon pa ako, may lumulusong nang una sa akin.” Sinabi sa kanya ni Jesus: “Bumangon ka, buhatin mo ang iyong higaan at maglakadlakad!” At dagling umigi ang tao, at binuhat niya ang kanyang higaan at naglakad-lakad. Araw nga ng Pahinga ang araw na iyon. Kaya sinabi ng mga Judio sa taong pinagaling: “Araw ng Pahinga ngayon at di ipinahihintulot na magbuhat ka ng higaan. Sumagot siya sa kanila: “Ang nagpaigi sa akin ang siyang nagsabi sa aking “Buhatin mo ang iyong higaan at lumakad ka.” Tinanong nila siya: “Sino ang taong nagsabi sa iyong ‘Magbuhat at maglakad-lakad?” Ngunit hindi alam ng pinagaling kung sino siya, sapagkat nakatalilis si Jesus dahil maraming tao sa lugar na iyon. Pagkatapos nito, natagpuan siya ni Jesus sa Templo at sinabi niya sa kanya: “Hayan, maigi ka na. Huwag ka nang magkasala pa, at baka may masahol pang mangyari sa iyo.” Umalis ang tao at sinabi sa mga Judio na si Jesus ang nagpaigi sa kanya. Dahil dito, inusig ng mga Judio si Jesus sapagkat sa Araw ng Pahinga niya ginawa ang mga ito.
Pagninilay
Nabasa natin sa Ebanghelyo ngayon ang ikatlo sa pitong tanda o himala ni Jesus sa Ebanghelyo ayon kay San Juan: ang pagpapagaling sa paralitiko sa Bethesda. Ang karamdaman ng paralitiko na tumagal ng tatlumpu’t walong taon at, marahil, ang mahabang taon ng walang kabuluhang paghihintay ay maaaring pumatay sa kanyang pag-asa na gumaling pa. Ang sagot ng lalaki sa tanong ni Jesus ay nagpapahiwatig ng tiyak na kawalan ng pag-asa na gumaling pa siya. Laging hinahangad ng Panginoon na makisali sa ating hangarin. Hinihikayat niya tayong magkaroon ng pagnanais na magkaroon ng pag-asa, na lubhang kailangan sa panahon ng krisis. Nagkaroon ng tunay na tagpuan si Jesus at ang taong ito, bago sinabi ni Jesus sa kanya na kunin ang kanyang higaan at lumakad. Si Jesus ay hindi naglingkod sa mga tao sa isang hiwalay o malayong paraan. Nakipag-ugnayan Siya sa kanila sa isang magalang na paraan, sa paraang sineseryoso sila bilang tao at nag-aanyaya sa kanila na magbahagi ng isang bagay sa kanilang kuwento. Sa paggawa nito, ipinapakita ni Jesus kung paano tayo makikipag-ugnayan sa isa’t isa. Inihahayag din niya kung paano niya gustong makipag-ugnayan sa bawat isa sa atin. Inaanyayahan tayo ni Jesus na buksan ang ating mga puso upang ibahagi sa kaniya ang ating kuwento. Ang paglalahad ng sarili nating kuwento sa Panginoon ay lumilikha ng isang puwang upang matagpuan natin ang biyaya ng Diyos sa pamamagitan ng ating buhay na mga karanasan.
© Copyright Pang Araw-araw 2026
2014 Copyright. Claretian Communications Foundation Inc
