Oktubre 12, 2025

Ebanghelyo: Lucas 17:11-19
Habang papunta si Jesus sa Jerusalem, dumaan siya sa hangganan ng Samaria sa Galilea. At pagpasok niya sa isang nayon, may sampung lalaking may ketong ang lumabas para salubungin siya. Tumayo ang mga ito sa malayo at tumawag nang malakas: “Jesus, Guro, maawa ka sa amin.” At sinabi naman sa kanila ni Jesus: “Umalis kayo at humarap sa mga pari.” At nangyari na gumaling sila habang naglalakad. Isa sa kanila ang agad na nagbalik nang makita niyang gumaling siya, at pasigaw niyang pinuri ang Diyos. Nagpatirapa siya sa paanan ni Jesus, sa pagpapasalamat sa kanya. Isa
siyang Samaritano. Kaya sinabi ni Jesus: “Di ba’t sampu ang gumaling? Nasaan ang siyam? Wala bang bumalik para magpuri sa Diyos kundi ang dayuhang ito?” At sinabi sa kanya ni Jesus: “Tumayo ka, iniligtas ka ng iyong pananampalataya.”

Pagninilay

“Maging tapat sa Diyos na nagmamahal.” Tinuturuan tayo ng mga pagbasa na kilalanin ang Diyos bilang napakabuti at mapagmahal na Diyos. Siya ay tunay na Diyos na nakikinig sa kanyang bayang hinirang at minamahal. At ipinakikita sa atin kung paano naging mabuti at tapat ang Diyos sa kabila ng lahat ng pagkakasala at pagkukulang ng tao. Kaya naman, ginigising ang ating isipan at puso sa linggong ito, na tayo sana ay maging tapat din sa iyos na nagmahal. Sa ebanghelyo, nabasa natin na sampung ketongin ang pinagaling ng Diyos tanging iisa lamang ang naging tapat, nagpasalamat at tunay na nagmahal. Nasaan na ang siyam? Maaring makita natin ang ating buhay sa isang taon na bumalik sa Panginoon upang magpasalamat at magpuri o kaya sa siyam na ipinapatuloy na lamang ang kanilang paglalakbay. Tinatawag tayo na maging tapat dahil ang Diyos natin ay nagmamahal at nanatiling tapat. Ang pagmamahal ng Diyos ay mananatili dahil ang kanyang pag-ibig sa tao ay walang-hanggan. Dumalangin at laging lumapit sa Diyos at matuto tayong maging tapat kahit sa kabila ng kapighatian o kasaganahan ng ating buhay. Ang ating pananampalataya ay ang tanging nagpapalakas sa atin sa gitna ng pagsubok. Dahil dito nauunawaan natin ang mga misteryo ng buhay. Ito ay nagbibigay sa atin ng malalim na dahilan upang magpatuloy sa paglalakbay tungo sa Kaharian ng Diyos kung saan namamayani ay kapayapaan at pagmamahalan. Sikapin natin magkaisa sa ating sama-samang paglalakbay bilang isang Parokya.

© Copyright Pang Araw-araw 2025