Oktubre 16, 2025

Ebanghelyo: Lucas 11:47-54
Sawimpalad kayong nagtatayo ng mga puntod sa mga propetang pinatay ng inyong mga ama. Sa gayon ninyo inaamin at sinasang-ayunan ang mga ginawa ng inyong mga ama; iniligpit nila ang mga propeta, at makapagtatayo na kayo ngayon. (Sinabi rin ng Karunungan ng Diyos:) Nagsusugo ako sa kanila ng mga propeta at mga apostol ngunit uusigin nila at papatayin ang ilan sa kanila. Kayat papapanagutin ang salinlahing ito sa dugo ng lahat ng propeta, sa dugong nabuhos mula pa sa pagkatatag ng mundo, mula sa dugo ni Abel hanggang sa dugo ni Zacarias na nasawi sa pagitan ng altar at ng santuwaryo. Oo, sinasabi ko sa inyo, papapanagutin ang salinlahing ito. Sawimpalad kayong mga guro ng Batas na umagaw sa susi ng kaalaman. Hindi na kayo pumasok at hinadlangan pa ninyo ang mga makapapasok.” Pagkatapos ay umalis si Jesus at sinimulan naman ng mga guro ng Batas at mga Pariseo na mahigpit na makipagtalo sa kanya. Pinapagsalita nila siya tungkol sa maraming bagay at pilit na sinisilo sa anumang sinasabi niya.

Pagninilay

“Tayong lahat ay makasalanan.” Hindi natin maiaalis na maraming
tao sa panahon ngayon ang nagiging makasarili at mapagkamkam ng kapangyarihan na kung minsan kapag naabot na nila ang tagumpay tila baga’y nawawala na ang Diyos sa kanilang mga buhay. Mahalaga sa buhay natin bilang mga tao na tayo ay may kinikilalang Diyos. Ang Diyos na puno ng awa at pagmamahal. Bagama’t inihayag sa atin noong una ang mga batas na ibinigay ng Diyos kay Moises, pumapangibabaw pa rin dito ang pagibig ng Diyos sa ating lahat. Kahit na tayo ay paulit-ulit na nagkukulang at nagkakasala pinapatawad pa rin niya tayo. Ang ating mga misyonero na nagpupumilit abutin ang mga malalayong lugar alang alang sa panananampalataya ay ang mga makabagong propeta na nagpapahayag ng katotohanang mahal tayo ng Diyos. Mahalagang maunawaan natin ang kagandahan ng ating pananampalatayang matagal nang sinubok ng panahon subalit matibay paring nakatayo. Napakagandang isipin at lasapin kung ang daigdig natin ngayon ay puno ng pagbibigayan, unawaan at kapakumbabaan, ito’y mga larawan ni Kristo na paulit-ulit pinapanawagan
sa mga tao. Sa diwa ng nangyaring sinodo, mahalaga pala na hindi lang para sa isang tao o ilang tao ang nagiisip para sa ikakabuti ng sambayanan. Kailangan pala ang pagtutulungan hindi lang sa gawain kundi “sa pagdedesisyon na sama-sama” (rf. XVI Ordinary General Assembly of the Synod of Bishops, A Synodal Church in Mission, 5.n)

© Copyright Pang Araw-araw 2025