Hunyo 20, 2026

Ebanghelyo: Mateo 6:24-34
Walang makakapagsilbi sa dalawang amo; siguradong kamumuhian ang isa at mamahalin naman ang isa pa, o magiging matapat sa una at mapababayaan ang pangalawa. Hindi kayo makapaglilingkod sa Diyos at sa pera. Kaya sinasabi ko sa inyo: huwag mag-alala sa kakanin at iinumin para sa inyong buhay, o sa idadamit para sa inyong katawan. Di ba’t mas mahalaga ang buhay kaysa pagkain, at ang katawan kaysa damit?Tingnan ninyo ang mga ibon sa langit: hindi sila naghahasik ni nag-aani, ni nag-iipon sa mga bodega, gayunma’y pinakakain sila ng inyong Amang nasa Langit. Di ba’t mas mahalaga kayo kaysa mga ibon? Sino sa inyo ang makapagdadagdag sa kanyang taas sa pagkabahala niya? At bakit kayo mababahala tungkol sa pananamit? Tingnan ninyo ang mga bulaklak sa bukid, sa pagtubo ng mga ito. Hindi sila nagtatrabaho o humahabi. Ngunit sinasabi ko sa inyo na kahit na si Solomon sa kanyang kayamanan ay hindi nakapagbihis gaya ng isa sa kanila. Kung ganito ang damit na ibinibigay ng Diyos sa mga damo – mga damong nasa bukid ngayon at susunugin bukas sa kalan, higit pa ang gagawin niya para sa inyo, mga taong maliit ang paniniwala! Huwag na kayong mag-alala at magsabi: Ano ang ating kakanin? Ano ang ating iinumin? O, ano ang ating isusuot? Ang mga pagano ang nababahala sa mga bagay na ito; ngunit alam ng inyong Amang nasa Langit na kailangan ninyo ang mga ito. Kaya hanapin muna ninyo ang kaharian at katarungan ng Diyos, at ibibigay rin sa inyo ang lahat ng ito. At huwag alalahanin ang bukas sapagkat bahala ang bukas na magalala sa kanyang sarili. Sapat na sa bawat araw ang sariling hirap nito.

Pagninilay

Naririnig at inaawit natin ang Thy Word is a Lamp unto my Feet and a Light unto my Path. Sinasabi ritong ang Salita ng Diyos ay ilaw sa ating paanan. Hindi sinabing ilaw sa buong daanan. Isa lamang itong lampara at hindi flashlight. Ang bawat hakbang ay may kalakip na pagtitiwala sa Diyos. Isipin na lamang natin kung ito ay flashlight at kita na natin kaagad ang buong daanan. May diwa pa kaya ng pagtitiwala sa Diyos at sa Kaniyang Salita kapag ganoon? Marahil ay wala na. Madalas sa ating pagsunod sa kalooban ng Diyos, mas nauuna ang ating pangamba, mas matimbang ang ating pag-aalinlangan. Sapagkat ang pagsunod sa kalooban ng Diyos ay may kalakip na malalim na pagtitiwala sa Kaniya. Mahirap sa ating mga tao ang magbigay ng 100% na tiwala. Sa atin bang pagsunod, marami ba tayong reservations? O natututo tayong ipagpasa Diyos ang maraming bagay? Ibigay ang lahat ng ating kaya at ipagpasa Diyos na ang iba. Ang hawak natin ay lampara na magsisilbing gabay sa mga susunod na hakbangin. Pagtiwalaan nawa natin ang Diyos sa paraang iyon.

© Copyright Pang Araw-araw 2026