Ebanghelyo: Lucas 10:25-37
May tumindig na isang guro ng Batas para subukin si Jesus. Sinabi niya: “Guro, ano ang gagawin ko para makamit ang buhay na walang hanggan?” Sumagot sa kanya si Jesus: “Ano ba ang nasusulat sa Batas, at paano mo ito naiintindihan?” Sumagot ang guro ng Batas: “Mamahalin mo ang Panginoon mong Diyos nang buo mong puso at nang buo mong kaluluwa at nang buo mong lakas at nang buo mong pag-iisip. At nasusulat din naman: Mamahalin mo ang iyong kapwa gaya ng iyong sarili.”
Noo’y sinabi ni Jesus sa kanya: “Tama ang sagot mo. Gawin mo ito at mabubuhay ka.” Pero gustong mangatwiran ng guro ng Batas kaya sinabi niya kay Jesus: “At sino naman ang aking kapwa?” Sinagot siya ni Jesus: “May isang taong bumaba mula sa Jerusalem papunta sa Jerico at nahulog siya sa kamay ng mga tulisan. Hinubaran siya ng mga ito at binugbog at saka iniwang halos patay na. Nagkataon namang may isang paring pababa rin sa daang iyon. Pagkakita sa kanya, lumihis ito ng daan. Gayundin naman, may isang Levitang napadaan sa lugar na iyon; nang makita siya’y lumihis din ito ng daan.
Pero may isang Samaritano namang naglalakbay na napadaan sa kinaroroonan niya; pagkakita nito sa kanya, naawa ito sa kanya. Kayat lumapit ito, binuhusan ng langis at alak ang kanyang mga sugat at binendahan. Isinakay nito ang tao sa sarili niyang hayop at dinala sa isang bahaypanuluyan at inalagaan. Kinabukasan, dumukot ang Samaritano ng dalawang denaryo, ibinigay sa may-ari ng bahay-panuluyan at sinabi: ‘Alagaan mo siya; sasagutin ko ang anumang karagdagang gastos pagbalik ko’.”
At sinabi ni Jesus: “Sa palagay mo, sino sa tatlong ito ang naging kapwa sa taong nahulog sa kamay ng mga tulisan?” Sagot ng guro: “Ang nagdalang-habag sa kanya.” Kaya sinabi ni Jesus sa kanya: “Humayo ka’t ganoon din ang gawin.”
Pagninilay
Sinabi ni San Antonio Maria Claret, “kapag naglilingkod sa isang misyon, isipin muna kung nararapat na gawin na naaayon sa tawag ng panahon at pagkakataon upang magtagumpay.” Ganito ang naisipang gawin ng Butihing Samaritano. Noong makita niya ang isang taong nag-aagaw buhay na naiwan sa kalye ay agad niya itong iniligtas sa pamamagitan ng pagdala sa kanya sa isang pagamutan. At siniguro niya na ang tao ay makakaligtas sa pamamagitan ng pagbabayad muna sa mga singil sa medikal. Dahil sa ginawa niya, siya ay naging isang kapwa sa taong ito. Ang ating pagdamay sa kapwa tao ay nagsisimula sa ating mabuting kalooban. Tayo ay hinirang upang maging tunay na tao sa ating kapwa. Nabubuhay tayo hindi lamang para sa ating sarili kundi para sa iba. Ito ang atas ng ating Panginoong Jesucristo sa bawat isa sa atin, ang magiging mabuting Samaritano sa ating kapwa na hindi inaalintana ang kultura, relihiyon at kasarian.
© Copyright Pang Araw-Araw 2021