Setyembre 07, 2025

Ebanghelyo: Lucas 14:25-33
Habang naglalakad ang napakaraming tao na kasama ni Jesus,
humarap siya sa kanila at sinabi: “Kung may dumating sa akin na di nagtatakwil sa pag-ibig sa kanyang ama at ina, at asawa at mga anak, at mga kapatid na lalaki at babae, at maging sa kanyang sarili, hindi siya puwedeng maging alagad ko. At hindi puwedeng maging alagad ko ang di nagpapasan ng kanyang krus sa pagsunod sa akin. At paano kung may magbalak magtayo ng silungan ng bantay sa bukid? Di ba’t uupo muna siya at tatantyahin ang gastos para malaman kung may sapat siya para maipatapos iyon? Sapagkat kung mailagay niya ang pundasyon at hindi naman niya iyon maipatapos, pagtatawanan lamang siya ng lahat: ‘Hayan ang nagsimulang magtayo at hindi na maipatapos.’ At paano kung may haring makikipagharap sa ibang hari? Di ba’t uupo muna siya para mag-isip kung kaya niya at ng sampung libong kasama niya na harapin ang dumarating na may dalawampung libo? At kung hindi naman, malayo pa ang isa ay magpapadala na siya ng mga sugo para makipag-areglo. Gayon din sa inyo. Hindi puwedeng maging alagad ko ang di tumatalikod sa lahat ng kanya.

Pagninilay

“Ang pagmamahal sa Diyos at pagsunod kay Kristo ang uunahin natin.” “Kung may dumating sa akin na di nagtatakwil sa pag-ibig sa kanyang ama at ina, at asawa at mga anak, at mga kapatid, at maging sa kanyang sarili, hindi siya karapat-dapat na maging alagad ko.” Mabigat ang salitang “itakwil” na para bang kabalintunaan ng utos na mahalin ang kapwa at ang paggalang sa atin mga magulang. Sa kultura ng mga Hudyo, ibig lamang nitong sabihin na ang pagmamahal sa Diyos at pagsunod kay Kristo ang uunahin natin kaysa pagmamahal sa ating pamilya. Ito ay mangyayari lamang kung may conflict sa pagmamahal sa Diyos at pagmamahal sa kapwa. Halimbawa, tinatawag ka ng Diyos upang maglingkod bilang
isang pari o madre subalit ito ay mahigpit na tinututulan ng iyong magulang at mga kapatid, dapat maging maliwanag na ang panawagan ng Diyos ang dapat maging matimbang sa ating pagpapasya. Ang iyong kapatid ay nakagawa ng krimen, naging addict sa droga at naging pusher pa. Masakit man sa ating kalooban, dapat na ito ay tanggapin at hindi itago, dapat na iparehab siya o ipakulong kung kinakailangan.

© Copyright Pang Araw-araw 2025