Oktubre 13, 2025

Ebanghelyo: Lucas 11:29-32
Nang dumadagsa na ang mga tao, nagsimulang magsalita si Jesus: “Masamang lahi ang lahing ito; humihingi ito ng palatandaan pero walang ibang palatandaang ibibigay rito kundi ang palatandaan ni Jonas. At kung paanong naging palatandaan si Jonas para sa mga taga-Ninive, gayundin naman ang Anak ng Tao para sa mga tao sa kasalukuyan. Sa paghuhukom, babangon ang Reyna ng Timog kasama ng mga lalaki ng lahing ito at hahatulan sila. Sapagkat dumating siya mula sa kabilang dulo ng mundo para masaksihan ang karunungan ni Solomon at dito’y may mas dakila pa kay Solomon. Sa paghuhukom, babangon ang mga lalaking taga- Ninive kasama ng salinlahing ito at hahatulan nila ito dahil nagbalik-loob sila sa pangangaral ni Jonas; at dito’y may mas dakila pa kay Jonas.

Pagninilay

“Paghahanap ng mga tanda.” Sa buhay, kadalasan lagi tayong naghahanap ng mga palatandaan, kung ang ito talaga ang dapat natin gawin. Tulad na
lamang ng mga desisyon sa buhay, naghahanap tayo ng palatandaan kung ito ang kalooban ng Diyos. Walang masama na maghanap at humingi ng mga tanda mula sa Diyos subalit pina-aalalahan tayong lahat ng Mabuting Balita na minsan hindi na natin kailangan ng tanda sapagkat ibinibigay na sa atin ng Diyos ang dapat nating gampanan. Katulad ng pagbabalik- loob sa Kanya, pagsisisi sa mga kasalanan at pagbabagong-buhay, hindi na kailangan ng tanda dahil ito ay tama at dapat nating gawin bilang mga nanalig at nagmamahal kay Kristo. Kung humihingi man tayo ng palatandaan, sapat nang makita si Kristo ang tunay na tanda ng Diyos. Inaanyayahan tayong isabuhay ang kanyang turo – ang magmahal sa kabila ng lahat. Ito ang hamon sa ating lahat na maisabuhay si Jesus at makita Siya sa ating pakikibaka sa buhay na ito hanggang makarating tayo sa ating patunguhan walang iba kundi ang Diyos. Naniniwala tayo na ang taon ng Hubileo, 2025 at ang bunga ng sinodo ay palatandaan ng kalooban ng Diyos. Sa salita ng Papa Francisco, sabi niya: “ang synodality ay ang inaasahan ng
Diyos sa ika tatlong Millennio” (rf. Papal Address, 50th anniversary of the Synod of Bishop, 2015)

© Copyright Pang Araw-araw 2025