Setyembre 14, 2026

Ebanghelyo: Juan 3:13-17
Walang umakyat sa langit maliban sa bumaba mula sa langit – ang Anak ng Tao. At kung paanong itinaas ni Moises ang ahas sa disyerto, gayundin dapat itaas ang Anak ng Tao upang magkaroon ng buhay magpakailanman ang bawat nananalig sa kanya. Ganito nga kamahal ng Diyos ang mundo! Kayat ibinigay niya ang kanyang bugtong na anak upang hindi na mawala ang bawat nananalig sa kanya kundi magkaroon ng buhay magpakailanman. Hindi nga sinugo ng Diyos sa mundo ang Anak upang hukuman ang mundo kundi upang maligtas ang mundo sa pamamagitan niya.

Pagninilay

Ang krus, na minsang naging simbolo ng kahihiyan, ay naging tanda ng kaligtasan. Inihalintulad ni Jesus ang sarili sa tansong ahas na itinaas ni Moises sa ilang. Kung paano tumingin ang mga Israelita sa tansong ahas upang gumaling, tayo naman ay tinatawag na tumingin kay Jesus na nakapako sa krus upang tayo’y maligtas. Sa bawat sakripisyo Niya, ipinakita ang pag-ibig na walang hanggan at walang kapantay. Ang pagmamahal ng Diyos ay hindi eksklusibo. Sinabi Niya na sinuman ang sumampalataya ay magkakaroon ng buhay na walang hanggan. Hindi Niya tayo pinipilit, ngunit binibigyan Niya tayo ng kalayaan upang tanggapin ang alok Niyang kaligtasan. Sa panahon ngayon, tayo ay hinahamon na mamuhay nang may pananampalataya at pag-ibig. Ipinapaalala sa atin ng talatang ito na mahal tayo ng Diyos at nais Niya tayong makasama sa buhay na walang hanggan. Tanggapin natin si Jesus bilang ating Tagapagligtas at tanggapin ang Kaniyang walang hanggang pag-ibig.

© Copyright Pang Araw-araw 2026