Agosto 05, 2026

Ebanghelyo: Mateo 15:21-28
Nagkaalis sa lugar na iyon, pumunta si Jesus sa gawing Tiro at Sidon. May isang babaeng Kananea noon na nagpunta sa dakong iyon at sumigaw: “Panginoon, anak ni David, maawa ka sa akin! Pinahihirapan ng isang demonyo ang anak kong babae.” Ngunit hindi siya tinugon ni Jesus kaya lumapit ang kanyang mga alagad at hiniling ng mga ito: “Paalisin mo na siya’t sigaw siya nang sigaw sa likod natin.” At sinabi sa kanya ni Jesus: “Sa nawawalang tupa ng bayan ng Israel ako sinugo.” Ngunit lumapit ang babae at lumuhod sa harap ni Jesus at sinabi: “Ginoo, tulungan mo ako!” Sumagot si Jesus: “Hindi tama na kunin ang tinapay sa mga bata at itapon ito sa mga tuta.” Sumagot ang babae: “Totoo nga, Ginoo, pero kinakain naman ng mga tuta ang mga nalalaglag mula sa hapag ng kanilang mga amo.” Kaya nagsalita sa kanya si Jesus: “Babae, napakalaki ng iyong pananalig! Maganap sa iyo ayon sa nais mo.” At nang oras ding iyon, gumaling ang kanyang anak.

Pagninilay

Lumapit ang isang babaeng Cananea, na hindi Judio, upang humingi ng tulong para sa kanyang anak na sinasapian ng masamang espiritu. Sa una, tila baga tinanggihan ni Jesus ang kanyang pakiusap. Ngunit sa kabila ng tila pagtanggi, nagpursigi ang babae, nagpapakita ng kanyang malalim na pananampalataya at pag-asa sa kagalingan na maibibigay ni Jesus.Kaya pinaunlakan siya ni Jesus at pinagaling ang kanyang anak. Ipinapakita nito na ang biyaya ng Diyos ay hindi lamang para sa
mga Judio kundi para sa lahat ng may pananampalataya, anuman ang kanilang lahi o pinagmulan.
Ang pananampalataya ng babaeng Cananea ay nagsilbing halimbawa para sa lahat ng mga
Kristiyano. Ipinakita niya ang isang uri ng pananampalataya na hindi sumusuko kahit sa harap
ng pagsubok at tila pagtanggi. Ang kanyang katatagan at pagtitiwala kay Jesus ay nagbibigay
inspirasyon sa atin upang huwag mawalan ng pag-asa at patuloy na manalig sa kabila ng mga
hamon. Ipinapaalala sa atin na ang awa at pagmamahal ng Diyos ay walang hangganan.

© Copyright Pang Araw-araw 2026