Ebanghelyo: Mt 5: 33-37
Narinig na rin ninyo na sinabi sa inyong mga ninuno: Huwag kang sisira sa iyong sinumpaan. Tuparin mo ang sinumpaang pangako sa Panginoon. Ngunit sinasabi ko naman sa inyo: huwag kayong manumpa sa ngalan ng Langit pagkat naroon ang trono ng Diyos, ni sa ngalan ng lupa pagkat ito ang tuntungan ng kanyang mga paa, ni sa ngalan ng Jerusalem pagkat ito ang lunsod ng Dakilang Hari. Huwag kang manumpa ni sa ngalan ng iyong ulo pagkat ni hindi mo kayang paputiin o paitimin ni isang hibla ng iyong buhok. Sabihin mong oo kung oo at hindi kung hindi. Ano pa mang sasabihin mo’y sa demonyo na galing.
Pagninilay
Minsan tayo ay sumusumpa sa ngalan ng Diyos, lalo na kung ito ay para sa ating minamahal. Ang pagsumpa ay nangangahulugan ng taos pusong pagtupad sa isang pangako. Pero minsan ito ay isang palabas lamang dahil may gusto tayong makuha at pansariling layunin. Sinasabi sa Ebanghelyo na ang panunumpa ay isang tipan sa pagitan ng dalawang indibidwal. Tulad ng sinasabi ng lumang kasabihan, “Hindi lahat ay perpekto o hindi lahat ay tumutupad sa sinumpaan.” Tayo, bilang mga tao, hindi natin mahuhulaan ang lahat ng posibleng kahihinatnan at maaaring hindi matupad ang lahat ng sinumpaang nagawa. Kung hindi natin matutupad ang ating mga pangako wala itong kabuluhan. Kaya winika ni Jesus na dapat totoo tayo sa ating mga sinasabi at maging tapat. Kung hindi tayo sigurado sa isang bagay, huwag bastabasta magbitaw ng salita at magbigay ng maling pagasa sa kapwa. Ang hindi pagsasabi ng katotohanan ay gawain ng demonyo.
© Copyright Pang Araw-Araw 2024