Ebanghelyo: Lucas 11: 37-41
Matapos magsalita si Jesus, inanyayahan siya ng isang Pariseo na kumain sa bahay nito. Pumasok siya at dumulog sa hapag. At nagtaka ang Pariseo nang makitang hindi muna siya naghugas ng kamay bago kumain. Ngunit sinabi sa kanya ng Panginoon: “Kayong mga Pariseo, ugali ninyong linisin ang labas ng mga baso’t pinggan pero naguumapaw naman sa kasakiman at kasamaan ang inyong loob! Mga hangal! Di ba’t ang maygawa ng labas ang siya ring maygawa ng loob? Pero naglilimos lamang kayo at sa akala ninyo’y malinis na ang lahat.
Pagninilay
“Ang Diyos ay tapat at mabuti.” Ang mga pagbasa para sa araw na ito ay paalala na kung sino tayo sa harap ng Diyos. Sino nga ba tayo? Sino nga ba ako? Isang tanong na maaring may malawak na sagot at minsan pa nga hindi ito masagotsagot. Ipinauunawa sa atin na ang pagiging totoo sa sarili ay naka base sa kung ano ang kagustuhan ng Diyos. Kung ang isang tao ay magulang kailangan niya na maging mabuting magulang sa salita at gawa. Kung ano ang ating trabaho sa lipunan at sa pamilya natin, iyon tayo. Dagdag pa rito, hindi lang tayo magulang, anak, kapatid, kaibigan, kaklase, guro, at kung ano-ano pa dahil higit sa lahat tayo ay may mga anak
ng Diyos, mga kapatid ni Jesus. Walang kwenta ang ating mga propesyon at mga katayuan kung hindi natin kilala ang totoong tayo. Sa Mabuting Balita iginiit ng ating Panginoon na hangal ang mga Pariseo dahil walang kwenta ang lahat ng kanilang ginawa. Hindi nila nauunawaan ang katotohanan at pagmamahal ng Diyos. Halos mga pakitangtao lamang, manhid at wala sa
katuturan ang kanilang itinuturo at ginagawa. Nawa, maunawaan natin
ang totoong kagustuhan ng Diyos sa pamamagitan ng malalim na pagkilala sa sarili at pagsasabuhay ng mga ito. Sino nga ba tayo? Dahil sa binyag, tayong lahat ay ang sambayanan ng Diyos. Ang bawat isa ay may natatanging gawain para sa ikalalaganap ng mabuting balita ni
Jesukristo (rf. XVI Ordinary General Assembly of the Synod of Bishops, A
Synodal Church in Mission, 1.a)
© Copyright Pang Araw-araw 2025
2014 Copyright. Claretian Communications Foundation Inc
