Pebrero 11, 2026

Ebanghelyo: Marcos 7:14-23
Kaya tinawag ni Jesus ang mga tao at sinabi sa kanila: “Pakinggan ako at unawain sana ninyong lahat. Hindi ang pumapasok sa tao mula sa labas ang nakapagpaparumi sa kanya kundi ang lumalabas sa tao ang nakapagpaparumi sa kanya. Makinig ang may tainga.” Pagkalayo ni Jesus sa mga tao, nang nasa bahay na siya, tinanong siya ng kanyang mga alagad tungkol sa talinhagang ito. At sinabi niya: “Wala rin ba kayong pang-unawa? Hindi ba ninyo nauunawaan na sa bituka pumupunta ang anumang pumapasok sa tao mula sa labas? Sapagkat hindi sa puso ito pumapasok kundi sa tiyan at pagkatapos ay itinatapon sa labas.” (Sa gayo’y sinabi niya na malinis ang tanang mga pagkain.) At idinagdag niya: “Ang lumalabas sa tao ang nagpaparumi sa tao. Sa puso nga ng tao nagmumula ang masasamang hangarin – kahalayan, pagnanakaw, pagpatay sa kapwa, pakikiapid, kasakiman, kasamaan, pandaraya, kalaswaan, pagkainggit, paninira, kapalaluan, kabuktutan. Ang masasamang bagay na ito ang nagpaparumi sa tao.

Pagninilay

Ipinagdiriwang natin ngayon ang Kapistahan ng Mahal na Birhen ng Lourdes at itinuturing din natin ito bilang Pandaigdigang Araw para sa mga Maysakit. Sa Ebanghelyo, nabanggit naman sa atin ay hindi mga sakit ng katawan kundi mga sakit ng kaluluwa. Sinasabi ni Jesus na mula sa katawan ng tao lumalabas ang iba’t ibang kasalanan. Inilipat ni Jesus ang pokus mula sa isang pag-aalala sa panlabas, ritwal, at kalinisan, patungo sa isang pagtutok sa kung ano ang nasa loob ng tao, ang tinatawag na “puso”. Si Jesus ay higit na nag-aalala sa pinagbabatayan na mga saloobin at mga halaga ng mga tao kaysa sa kung sinusunod nila o hindi ang iba’t ibang mga regulasyon ng tao na itinuturing ng ilan na sagrado. Sinasabi ni Jesus na ang tunay na kalinisan ng kalooban ay hindi sa anumang panlabas na gawain kundi sa paggawa ng kabutihan. Ito ay nagpapahayag na sa kaloob-looban ng Diyos ay isang ganap na walang pag-iimbot na pag-ibig, na nahayag sa buhay, kamatayan at muling pagkabuhay ni Jesus. Ang pag-ibig na ito ay makapangyarihan, malikhain at nagbibigay-buhay. Ang ating tungkulin ay magkaroon ng mga puso tulad ng kay Jesus at gaya rin ni Maria na tumawag sa atin bilang ang Birhen ng Lourdes na manalangin at magbalik-loob sa Diyos.

© Copyright Pang Araw-araw 2026