Ebanghelyo: Juan 3:7b-15
Huwag kang magtaka dahil sinabi ko sa iyong kailangan kayong isilang mula sa itaas.
Umihip ang hangin kung saan nito nais, at naririnig mo ang ihip nito pero hindi mo alam kung saan ito galing at kung saan ito patungo. Gayon din nga ang bawat isinilang mula sa Espiritu.”
Sumagot sa kanya si Nicodemo: “Paano pupuwede ang mga ito?” Sinabi sa kanya ni Jesus: “Ikaw ang guro ng Israel at hindi mo alam ang mga ito?
Talagang-talagang sinasabi ko sa iyo: ang alam namin ang aming sinasabi at ang nakita namin ang aming pinatutunayan, at hindi naman n’yo tinatanggap ang aming patunay. Mga bagay na nga sa lupa ang sinasabi ko sa inyo at hindi kayo naniniwala, kaya paano kayo maniniwala kapag mga bagay sa langit ang sasabihin ko sa inyo. Walang umakyat sa langit maliban sa bumaba mula sa langit – ang Anak ng Tao.
At kung paanong itinaas ni Moises ang ahas sa disyerto, gayundin dapat itaas ang Anak ng Tao upang magkaroon ng buhay magpakailanman ang bawat nananalig sa kanya.
Pagninilay
Simbolo ng paghihirap at kamatayan ang dating pakahulugan sa krus. Pagkapako sa krus ang kaparusahang kamatayan sa mga kriminal. Mistula tayong pumapasan ng krus kung may mga pagdurusa tayo sa ating buhay. Lahat ng ito ay binago ni Jesus. “At kung paanong itinaas ni Moises ang tansong ahas sa disyerto, gayundin dapat itaas ang Anak ng Tao upang magkaroon ng buhay magpakailanman ang bawat nananalig sa kanya.” Kung paano gumaling ang sino mang tumingin sa bronseng ahas na itinaas ni Moises, gayundin naman ang kaligtasang hatid ni Jesus na ipinako sa krus. Buhay magpakailanman ang hatid ng sino mang nananalig sa kanya. Pinaging banal ni Jesus ang krus. Simbolo na ito hindi ng kamatayan kundi ng buhay na walang hanggan.
© Copyright Pang Araw-Araw 2021