Agosto 26, 2026

Ebanghelyo: Mateo 23:27-32
Kawawa kayong mga guro ng Batas at mga Pariseo, kayong mga mapagkunwari! Para kayong mga pinaputing libingan na maganda sa labas pero puno ng buto ng mga patay at ng iba pang karumihan ang loob. Gayundin naman, mukha kayong mga taong banal ngunit puno naman ng pagkukunwari at kasamaan ang kalooban. Kawawa kayong mga guro ng Batas at mga Pariseo, kayong mga mapagkunwari! Nagtatayo kayo ng mga monumento para sa mga propeta at pinapalamutian ang mga bantayog ng mga banal na tao. Sinasabi ninyo: ‘Kung tayo ang nabuhay sa panahon ng ating mga ninuno, hindi sana tayo sumang-ayon na patayin ang mga propeta.’ Kaya kayo ang umaamin na mga anak kayo ng mga pumatay sa mga propeta. At ngayon, tapusin ninyo ang sinimulan ng inyong mga ninuno!

Pagninilay

Ang ebanghelyo ngayon ay kadugtong at pagpapapalalim ng tema sa ebanghelyo kahapon. Nagbigay uli si Jesus ng matinding babala laban sa pagkukunwari at panlabas na kabanalan. Tinawag Niya ang mga eskriba at Pariseo na “mga libingang pinaputi”—maganda sa labas ngunit puno ng kabulukan sa loob. Ito ay nagpapakita sa panganib ng pagkukunwari sa relihiyon, kung saan ang mga panlabas na gawi ng kabanalan ay hindi tumutugma sa tunay na kalagayan ng puso. Hinihikayat tayo ni Jesus na suriin ang ating mga sarili. Ang pagiging Kristiyano ay hindi lamang tungkol sa pagsunod sa mga ritwal at kautusan, kundi sa pagkakaroon ng tunay na ugnayan sa Diyos na makikita sa ating mga gawa at asal. Ang panlabas na anyo ng kabanalan ay walang halaga kung ito’y hindi sumasalamin sa isang pusong puno ng pagmamahal, awa, at katapatan.
Binalaan din ni Jesus ang mga lider relihiyoso na ipinagmamalaki ang kanilang kaalaman sa kasaysayan ng mga propeta ngunit hindi kinikilala ang kanilang sariling pagkukulang. Ang kanilang pagkukunwari ay nagdadala ng mas malaking pananagutan dahil sa kanilang posisyon at impluwensya. Sa buhay, tayo ay tinatawag na maging tapat at tunay sa ating pananampalataya. Ang tunay na kabanalan ay makikita sa isang pusong bukas sa Diyos, handang magbago, at kumikilos ayon sa Kanyang kalooban. Sa halip na magpakitang-tao, dapat tayong magpursige na maging tunay na saksi ng pag-ibig at awa ng Diyos sa ating kapwa.

© Copyright Pang Araw-araw 2026