Ebanghelyo: Mateo 14:13-21
Nang marinig ito ni Jesus, lumayo siya at namangka na sila-sila lang patungo sa ilang na lugar. Ngunit nalaman ito ng mga tao at sumunod sila sa kanya na naglalakad mula sa kanilang mga bayan. Pagdating ni Jesus sa pampang, nakita niya ang maraming taong nagkakatipon doon at naawa siya sa kanila. At pinagaling niya ang mga maysakit.
Nang hapon na, lumapit sa kanya ang mga alagad at sinabi: “Nasa ilang na lugar tayo at lampas na ang oras. Paalisin mo na ang maraming taong ito para makapunta sila sa mga nayon at makabili ng kani-kanilang pagkain.”
Ngunit sumagot si Jesus: “Hindi na nila kailangang umalis pa; kayo ang magbigay sa kanila ng makakain.” Sinabi nila: “Wala kami rito kundi limang tinapay at dalawang isda.” Sinabi niya: “Akin na.”
At iniutos niyang maupo sa damuhan ang makapal na tao. Kinuha niya ang limang tinapay at dalawang isda, tumingala sa langit, nagpuri, hinati ang mga tinapay at ibinigay sa kanyang mga alagad; at ibinigay rin nila sa mga tao. At kumain silang lahat at nabusog, at inipon nila ang mga natirang pira-piraso – labindalawang punong basket. Mga limanlibong lalaki ang napakain bukod pa sa mga babae at mga bata.
Pagninilay
Sa ating makabagong panahon ay inaanyayahan din tayo ng Panginoong Jesucristo na maging mga “miracle workers”. Ang paggawa ng isang himala ay hindi isang tulad ng mahika na nagtataglay ng daya. Kung ating babalikan kung ano ang nag-udyok kay Jesus upang mapakain niya ang limang libo, ito ay ang matinding habag at awa Niya para sa kanila. Gayun din naman, kung tayo ay may pakundangan sa pangangailangan ng iba, maaaring maging instrumento tayo ng kaginhawaan ng buhay ng ating kapwa. Ang paglabas sa sarili ang uumpisa ng isang himala. Kung ito ay umpisahan natin, magsisilbing inspirasyon ito sa ibang tao at ito ay ipagpapatuloy nila. Kung matututo lamang tayong magbahagi sa iba ng bukal sa ating puso, mababawasan ang mga taong naghihirap at nagugutom.
© Copyright Pang Araw-Araw 2021
