Ebanghelyo: Lucas 4:16-30
Pagdating niya sa Nazaret, kung saan siya lumaki, pumasok siya sa sinagoga sa Araw ng Pahinga ayon sa kanyang kinaugalian. Tumindig siya para bumasa ng Kasulatan, at iniabot sa kanya ang aklat ni Propeta Isaias.
Sa paglaladlad niya sa rolyo, natagpuan niya ang lugar kung saan nasusulat: “Sumasaakin ang Espiritu ng Panginoon kayat pinahiran niya ako upang ihatid ang mabuting balita sa mga dukha. Sinugo niya ako upang ipahayag ang paglaya sa mga bilanggo, sa mga bulag ang pagkabawi ng paningin, upang bigyang-ginhawa ang mga api, at ipahayag ang taon ng kabutihang-loob ng Panginoon.”
Binilot ni Jesus ang aklat, ibinigay ito sa tagapaglingkod at naupo. At nakatuon sa kanya ang mga mata ng lahat ng nasa sinagoga. Sinimulan niyang magsalita sa kanila: “Isinakatuparan ang Kasulatang ito ngayon habang nakikinig kayo.”
At sumang-ayon silang lahat sa kanya habang nagtataka sa gayong pagpapahayag ng kabutihang-loob ng Diyos na nanggaling sa kanyang bibig. At sinabi nila: “Hindi ba’t ito ang anak ni Jose?” Nagsalita si Jesus sa kanila: “Tiyak na babanggitin ninyo sa akin ang kasabihang: ‘Manggagamot, pagalingin mo ang iyong sarili! Gawin mo rin dito sa iyong bayan ang mga bagay na narinig naming ginawa mo sa Capernaum’.”
At idinagdag niya: “Talagang sinasabi ko: walang propetang katanggap-tanggap sa sarili niyang bayan. Tinitiyak ko sa inyo na maraming babaeng balo noon sa kapanahunan ni Elias nang sarhan ang langit sa loob ng tatlo’t kalahating taon at nagkaroon ng matinding taggutom sa buong lupain. Gayon pa ma’y hindi ipinadala si Elias sa isa man sa kanila kundi sa babaeng balo ng Sarepta sa may Sidon. Marami ring mayketong sa Israel sa kapanahunan ni Propeta Eliseo pero wala sa kanilang pinagaling kundi ang Siriong si Naaman.”
Napuno ng galit ang lahat sa sinagoga pagkarinig dito, tumindig sila at ipinagtulakan siya sa labas ng bayan. Dinala nila siya sa gilid ng burol na kinatatayuan ng kanilang bayan para ihulog. Ngunit dumaan siya sa gitna nila at umalis.
Pagninilay
Ang pagpapahayag ni Jesus ng aklat ni Propeta Isaias ay isang paalaala sa atin na ang dala Niya ay kaligtasan para sa lahat. Ang buong texto sa Isaias ay nagtatapos sa paghuhukom ngunit hindi ito binasa ni Jesus. Ito ang nais bigyang diin ni Jesus, ang pagliligtas sa dukha, bilanggo, bulag, at mga naaapi. Marahil ito ang naging dahilan ng pagkagalit ng mga tao sa sinagoga. Ang pahayag ni Jesus na ang kaligtasan ay para sa lahat at hindi lamang sa mga taong nakaalam ng batas at sumusunod sa batas ng simbahan. Minsan, ganito rin ang tingin natin sa ibang tao: hindi sila nararapat. Akala natin, dahil tayo ay nagbabasa ng Bibliya araw-araw, tayo lamang ang maliligtas. Ang Ebanghelyo ngayon ay isang paanayaya na maging bukas tayo sa lahat ng ating kapwa. Maaaring hindi siya karapatdapat sa mata natin, ngunit sa mata ng Diyos sila ay kaniyang tinatawag at pinupuspos din. Huwag nawa tayo maging makasarili, dahil ang pagdating ni Jesus ay di lamang para sa iilan, Siya ay para sa lahat.
© Copyright Pang Araw-Araw 2021