Ebanghelyo: Mateo 11:25-27
Nagsalita si Jesus sa pagkakataong iyon: “Pinupuri kita Amang Panginoon ng Langit at lupa, sapagkat itinago mo ang mga bagay na ito sa matatalino at marurunong, at ipinamulat mo naman sa mga karaniwang tao. Oo, Ama, ito ang ikinasiya mo. Ipinagkatiwala sa akin ng aking Ama ang lahat. Walang nakakakilala sa Anak kundi ang Ama, at walang nakakakilala sa Ama kundi ang Anak at ang sinumang gustuhing pagbunyagan ng Anak.
Pagninilay
Ang ebanghelyo sa araw na ito ay nagpapakita ng pagkakilala ni Jesus sa karunungan ng Ama at sa kahalagahan ng pagiging mababang-loob. Sa mga salitang ito, ipinapakita ni Jesus na ang mga lihim ng kaharian ng Diyos ay ipinapahayag sa mga “sanggol,” hindi sa mga matatalino at may pinag-aralan. Bilang Kristiyano, maari nating basahin ang talatang ito bilang isang paalala na ang tunay na karunungan at pang-unawa ay hindi lamang nakukuha sa pamamagitan ng akademikong kaalaman o intelektwal na pagpapalalim, kundi sa pamamagitan ng pagiging bukas at mapagpakumbaba sa harap ng Diyos. Ang pagiging “sanggol” dito ay nangangahulugang pagiging tapat, walang kaplastikan, at handang tumanggap ng katotohanan mula sa Diyos. Ito rin ay panawagan para sa simbahan na maging tunay na mapagpakumbaba at sensitibo sa pangangailangan ng bawat isa, lalo na ang mga nasa laylayan ng lipunan. Sa pamamagitan ng pagkilala at pagtanggap sa karunungan ng mga dukha at inaapi, tunay nating naisasabuhay ang mensahe ng ebanghelyo at nagiging instrumento ng Diyos sa pagpapalaganap ng kaniyang pag-ibig at katarungan
© Copyright Pang Araw-araw 2026
2014 Copyright. Claretian Communications Foundation Inc
