Ebanghelyo: Juan 1:1-18
Sa simula’y naroroon na nga ang Wikang Salita, at naroroong kaharap ng Diyos ang Salita,at Diyos ang Salita. Naroroon na nga siyang kaharap ng Diyos sa simula. Sa pamamagitan niya nayari tanang mga bagay, at hiwalay sa kanya’y walang anumang nayari. Ang niyari ay sa kanya nagkabuhay, at ang buhay ang liwanag para sa mga tao. Nagningning sa karimlan ang liwanag at di ito nasugpo ng karimlan. May taong sugo ang Diyos – Juan ang kanyang pangalan. Dumating siya para sa pagpapatunay, para magpatunay tungkol sa Liwanag, upang makapanalig ang lahat sa pamamagitan niya. Hindi siya mismo ang Liwanag, kundi para magpatunay tungkol sa Liwanag. Pagkat paparating noon sa mundo ang Liwanag na totoo na siyang nagliliwanag sa bawat tao. Nasa mundo na nga siya, ang mundong nayari sa pamamagitan niya, at di naman siya kinilala ng mundo. Sa sariling kanya siya dumating at hindi siya tinanggap ng mga kanya. Ngunit sa lahat ng tumanggap sa kanya sa pananalig sa kanyang Pangalan, binigyang-kakayahan nga niya sila na maging mga anak ng Diyos. Ipinanganak nga sila, hindi mula sa dugo, ni mula sa kagustuhan ng laman, ni sa kagustuhan ng lalaki kundi mula sa Diyos. At naging laman ang Wikang- Salita, at itinayo ang kanyang Tolda sa atin, at nakita natin ang kanyang Luwalhati. Luwalhating mula sa Ama na bagay sa bugtong na Anak, lipos ng Kagandahang-loob at Katotohanan. Nagpapatunay sa kanya si Juan at isinisigaw: “Siya ang sinabi kong ‘Nauna na sa akin ang dumating na kasunod ko, pagkat bago ako’y siya na’.” Mula sa kanyang kapuspusan nga tumanggap tayong lahat – oo, abut-abot na kagandahang-loob. Sa pamamagitan ni Moises ibinigay ang Batas, sa pamamagitan naman ni Jesucristo dumating ang Kagandahang- loob at Katotohanan. Kailanma’y walang sinumang nakakita sa Diyos; ang Diyos na Anak na bugtong siyang nasa kandungan ng Ama – ang nagpahayag sa kanya.
Pagninilay
Matapos marinig ang kwento ng mga taong ginamit ng Panginoon upang matupad ang kanyang plano tulad ng mga kwento nina Elizabeth at Zacarias, Maria at Jose, at kung paano ipinaliwanag sa pamamagitan ng mga anghel ang plano ng Diyos sa lahat ng ito, ipinagdiriwang natin ngayon ang Pasko ng Pagsilang ng ating Panginoon bilang ang pinakataas na paghahayag ng Diyos mismo sa atin (Heb. 1:1-3). Hindi rin natin nakakalimutan ang kabayanihan at katapatan ni Juan Bautista habang sineseryoso natin ang pakikinig sa kanyang mensahe sa panahon ng Adbiyento. Upang makumpleto ang ating pag-unawa sa kung sino ang ipinanganak sa Belen, isaalang- alang muna natin ang gabi ng ebanghelyo na siyang pagsasalaysay sa kapanganakan ng ating Panginoon. Pagkatapos ay sasali tayo sa ebanghelyo ngayon na nagpapakilala kay Jesus, na siya ay tunay na tao at tunay na Diyos. Mula noon hanggang ngayon ay kasama na natin palagi ang Diyos.
© Copyright Pang Araw-Araw 2021