Ebanghelyo: Lucas 10:17-24
Tuwang-tuwang nagbalik ang Pitumpu’t dalawa at ang sabi: “Panginoon, mga demonyo ma’y sumuko sa amin dahil sa iyong pangalan.” Sinabi naman ni Jesus: “Nakita kong bumagsak na parang kidlat si Satanas mula sa langit. Binibigyan ko kayo ng kapangyarihang yumapak sa mga ahas at alakdan. Masusupil ninyo ang lahat ng kapangyarihan ng kaaway, at walang anumang makapipinsala sa inyo. Subalit magalak kayo hindi dahil sa pagsuko sa inyo ng mga espiritu kundi sapagkat nasusulat sa langit ang inyong mga pangalan.” Nang sandaling iyo’y nag-umapaw sa galak sa Espiritu Santo si Jesus at sinabi niya: “Pinupuri kita, Ama, Panginoon ng langit at lupa, dahil inilihim mo ang mga bagay na ito sa marurunong at matatalino, at ipinamulat mo naman sa maliliit. Oo, Ama, naging kalugud- lugod ito sa iyo. Ipinagkatiwala sa akin ng aking Ama ang lahat. Walang nakakakilala kung sino ang Anak kundi ang Ama, at kung sino ang Ama kundi ang Anak at ang sinumang gustuhing pagbunyagan ng Anak.” Pagkatapos ay bumaling si Jesus sa mga alagad at sinabi sa kanila nang sarilinan: “Mapalad ang mga matang nakakakita ng inyong nakikita. Sinasabi ko sa inyo na maraming propeta at hari ang nagnais makita ang inyong nakikita pero hindi nila nakita, at marinig ang inyong naririnig pero hindi nila narinig.”
Pagninilay
“Hindi na natin maunawaan ang mga bagay na tunay na mahalaga,” sabi ng aklat na ‘The Little Prince’ [Ang Munting Prinsipe]. Ang daling makaligtaan ng tao ang mga bagay na mahalaga. Ang ating lipunan ay higit na maalam kaysa marunong. Sa pagdami ng batas, sa pagdami rin ng paglabag; sa pagtaas ng pinag-aralan, sa pagbaba rin ng moralidad. Ang kapangyarihan na dapat gamitin sa paglilingkod ay inaabuso at ginagawang instrumento ng panggigipit at pambubusabos. Ayon sa isang may akda, ang makabagong mundo ay may kakaibang anyo ng ‘kabaliwan.’ Narating na ng tao ang kalawakan, pero hindi ang kanyang kalooban; mayroon tayong mga instrumento para makita ang mga bagay mula sa malayo, pero nakakaligtaan nating ‘makita’ ang ating kapwang nasa paligid lamang. Bilyong dolyar ang ginugugol ng tao sa paghahanap ng bagong planeta, pero bilyong dolyar din ang ginagastos natin para sirain ang mundong ating tirahan. Tunay ngang ang itinuturing na karunungan ng tao ay kamangmangan sa paningin ng Diyos. Lingid sa pang-unawa ng mga pantas ang karunungang hagip ng may kaisipang tulad ng sa bata.
© Copyright Pang Araw-araw 2026
2014 Copyright. Claretian Communications Foundation Inc
