Ebanghelyo: Marcos 2:1-12
Pagkaraan ng ilang araw, pumasok siya sa Capernaum. Nang mabalitang nasa bahay siya, marami ang nagtipon doon kaya wala nang lugar kahit sa may pintuan. At ipinahayag niya ang Salita. May mga tao namang dumating at dinala sa kanya ang isang paralitiko, na buhat-buhat ng apat. At nang hindi sila makalapit kay Jesus dahil sa dami ng tao, inalis nila ang mga tisa ng terasang nasa ibabaw ng kinaroroonan ni Jesus at pagkabukas nila nito, inihugos nila ang paralitiko na nasa higaan.
Nang makita ni Jesus ang kanilang pananalig, sinabi niya sa paralitiko: “Anak! Pinatawad na ang iyong mga kasalanan.” May ilang guro ng Batas naman na nakaupo roon at inisip nila: “Ano itong sinasabi niya? Talagang iniinsulto niya ang Diyos. Sino ba ang may kapangyarihang magpatawad ng mga kasalanan? Di ba’t ang Diyos lamang?” At agad na nalaman ni Jesus sa kanyang espiritu na ganoon ang kanilang mga niloloob na kaisipan. Kaya sinabi niya sa kanila: “Ano ang mga kaisipan ninyong ito? Ano ba ang mas madaling sabihin sa paralitiko: ‘Pinatawad na ang iyong mga kasalanan’ o ‘Tumayo ka, kunin ang iyong higaan at lumakad’? Dapat ninyong malaman na sa lupa ay may kapangyarihan ang Anak ng Tao na magpatawad ng kasalanan.”
At sinabi niya sa paralitiko: “Iniuutos ko sa iyo: bumangon ka, dalhin mo ang iyong higaan at umuwi.” At bumangon nga ang tao, agad na kinuha ang higaan at lumabas na nakikita ng lahat. Lubhang namangha ang lahat at nagpuri sila sa Diyos sa pagsasabing “Kailanma’y hindi pa kami nakakakita ng ganito.”
Pagninilay
Nakita ni Jesus ang laki ng pananampalataya ng mga taong nagdala sa kanya ng paralitiko upang mapagaling. Dahil dito, pinagaling Niya nga ito sa pamamagitan ng pagpapatawad sa kanyang mga kasalanan. Hindi naman matanggap ng mga tao ang kanilang narinig na may kakayahan si Jesus na makapagpatawad ng kasalanan. Hindi pa nila lubos na nakikilala si Jesus. Mas nakakakilala pa ang mga taong nagbuhat sa paralitiko sapagkat naniniwala silang mapapagaling ito ni Jesus. Naging mas paralitiko ang mga taong matigas ang puso sa pagtanggap kung sino si Jesus. Dahil sa kapatawarang nakamit, gumaling at nakalakad muli ang paralitiko. Ang katigasan ng puso dulot ng kasalanan at ang di pagtanggap sa grasya ng Panginoon ang nagsisilbing hadlang sa paglago sa ating buhay pananampalataya. Hilingin natin ang biyaya ng pusong bukas sa grasya ng kapatawaran ng Panginoon upang patuloy tayong lumago sa ating pananampalataya.
© Copyright Pang Araw-Araw 2023