Hunyo 01, 2026

Ebanghelyo: Marcos 12:1-12
At nagsimula siyang magsalita sa talinhaga. “May nagtanim ng ubasan; binakuran ang paligid nito, humukay para sa pisaan ng ubas, at nagtayo ng toreng bantayan. Pinaupahan niya ang ubasan sa mga magsasaka at naglakbay sa malayo. Nang panahon na ng anihan, pinapunta niya ang isang katulong sa mga magsasaka para kubrahin ang bahagi niya sa ani. Ngunit sinunggaban nila ito at pinaalis na walang dala. Nagpadala uli sa kanila ang may-ari ng isa pang katulong pero hinampas ito sa ulo at hinamak. Nagpadala rin siya ng iba ngunit pinatay naman ito. At marami pa rin siyang ipinadala; hinampas ang ilan sa kanila at pinatay ang iba. Mayroon pa siyang isa, ang minamahal na anak. At ipinadala niya siyang pinakahuli sa pag-aakalang ‘Igagalang nila ang aking anak.’ Ngunit nang makita siya ng mga magsasaka, inisip nila: ‘Ito ang tagapagmana. Patayin natin siya at mapapasaatin ang mana.’ Kaya hinuli nila siya at pinatay, at itinapon sa labas ng ubasan. Ano ngayon ang gagawin ng may-ari ng ubasan? Darating siya at lilipulin ang mga magsasaka at ibibigay ang ubasan sa iba. Hindi ba ninyo nabasa ang Kasulatang ito? Naging panulukang bato ang tinanggihan ng mga tagapagtayo. Gawa ito ng Panginoon, at kahanga-hanga ang ating nakita.” Huhulihin na sana nila siya pero natakot sila sa mga tao. Naunawaan nga nila na sila mismo ang tinutukoy niya sa talinhagang ito. Iniwan nila siya at lumayo.

Pagninilay

Patu-patuloy na ipinamamalas ng Diyos sa atin ang Kaniyang pagpapala. Katulad ng may-ari ng ubasan, ang Diyos ay nagpapamalas ng Kaniyang pagmamahal sa pamamagitan ng mga biyayang ipinagkakaloob sa atin. Hindi ito palaging materyal na bagay. Ito ay maaring mga kalakasan na
mayroon tayo, biyaya at talentong hindi nahahawakan ng mga kamay ngunit tinatangi natin sa ating mga puso. Ngunit paano ba natin ginagamit ang mga biyayang-kaloob sa atin? Ito ba’y para lamang sa ating sariling kapakanan? O ito ba ay naibabahagi natin sa iba? Ang atin bang pagtugon sa tawag ng Diyos ay tungo din sa kaligtasan ng ating kapwa o para lamang sa ating sarili? Pagnilayan natin ito ng husto upang sa pagdating ng anak ng may-ari ng ubasan, nawa ay hindi inggit o poot ang manaig sa atin, subalit ang lubos na pagtanggap kay Jesus sa ating mga kalooban. Bigyang-puwang natin si Jesus sa ating puso upang lubos tayong makatugon sa panawagan ng Diyos sa ating buhay.

© Copyright Pang Araw-araw 2026