Ebanghelyo: Juan 14:21-26
Ang tumutupad sa tinanggap niyang mga kautusan ko, siya ang nagmamahal sa akin. Mamahalin ng aking Ama ang nagmamahal sa akin, at mamahalin ko rin siya at ipamamalas ko sa kanya ang aking sarili.” Sinabi sa kanya ni Judas, hindi ang Iskariote: “Panginoon, paano mangyayaring sa amin mo ipamamalas ang iyong sarili at hindi sa mundo?” Sumagot si Jesus at sinabi sa kanya: “Kung may nagmamahal sa akin, isasakatuparan niya ang aking salita at mamahalin siya ng aking Ama at pupuntahan namin siya at sa kanya kami gagawa ng silid para sa aming sarili. Hindi naman isinasakatuparan ng hindi nagmamahal sa akin ang aking mga salita. At hindi sa akin ang salitang naririnig
n’yo kundi sa Amang nagpadala sa akin. Sinabi ko sa inyo ang mga ito habang namamalagi pa akong kasama ninyo. Ituturo naman sa inyo ng Tagapagtanggol ang lahat – ang Espiritu Santong ipadadala ng ama sa ngalan ko – at ipaaalaala niya sa inyo ang lahat ng sinabi ko sa inyo.
Pagninilay
Ang mga habilin ni Jesus ay para sa ating ikabubuti. Si Jesus ang isinugo ng Ama upang matanto natin na tayo’y kanyang minamahal. Kung tunay na iniibig natin ang Diyos, susundin natin ang kanyang mga utos. Ito ang makapagbibigay o makapagdadala sa atin patungo sa buhay na walang hanggan. Tandaan na sinumang sumasampalataya kay Jesus ay pinagpapala. Kasabay nito ang pangako na magpapadala ang Ama ng Banal na Espiritu upang gabayan tayo sa ating pananampalatayang paglalakbay. Isang paalaala na kailanman ay hindi tayo pababayaan ng Diyos. Patuloy siyang gagabay sa atin ngayon at magpakailanman.
© Copyright Pang Araw-Araw 2020